Reported Journalist:Zamil Shafeek
කොලොන්නාව ප්‍රදේශයේ ගංවතුර අවදානම අවම කිරීම සඳහා ක්‍රියාත්මක වැසි ජල අපවහන හා පරිසරය වැඩිදියුණු කිරීමේ ව්‍යාපෘතිවල ප්‍රගතිය සොයා බැලීමේ ක්ෂේත්‍ර නිරීක්ෂණයකට නාගරික සංවර්ධන නියෝජ්‍ය අමාත්‍ය එරංග ගුණසේකර මහතා අද (28) එක්විය.
මෙම නිරීක්ෂණයේදී සැළලිහිණි මාවත ඇල සංවර්ධන කටයුතු මෙන්ම පාලම්, බෝක්කු, ජල රැඳවුම් තටාක, වැව් සහ අතුරු ජලාපවහන පද්ධති ප්‍රතිසංස්කරණයට අදාළ කටයුතු පිළිබඳව ද අවධානය යොමු කෙරිණි.කැලණි ගඟ ආශ්‍රිත පහත්බිම්වල පිහිටි කොලොන්නාව ප්‍රදේශය නිරන්තරයෙන් ගංවතුර අවදානමට ලක්වන බැවින්, ජලාපවහන පද්ධති නවීකරණය කිරීම, ජලය ඉක්මනින් බැස යාමේ පහසුකම් වැඩිදියුණු කිරීම සහ ගංවතුර හානි අවම කිරීම මෙම ව්‍යාපෘතියේ ප්‍රධාන අරමුණ බව සඳහන් වේ.
ප්‍රවාහන, මහාමාර්ග සහ නාගරික සංවර්ධන අමාත්‍යාංශයේ මඟපෙන්වීම යටතේ ක්‍රියාත්මක මෙම ව්‍යාපෘතිය සඳහා රුපියල් මිලියන 10,700ක ප්‍රතිපාදන වෙන්කර ඇති අතර, නාගරික සංවර්ධන අධිකාරිය, ශ්‍රී ලංකා ඉඩම් සංවර්ධනය කිරීමේ සංස්ථාව, මාර්ග සංවර්ධන අධිකාරිය සහ පළාත් පාලන ආයතන එක්ව එය ක්‍රියාත්මක කරයි.
ව්‍යාපෘතිය යටතේ දහම්වෙල ඇල, පස්සන්න ඇල, සැළලිහිණි මාවත ඇල සහ දඬුකොට ඇල ඇතුළු ප්‍රධාන ජලාපවහන මාර්ග සංවර්ධනය කිරීමට සැලසුම් කර ඇති අතර, සැළලිහිණි මාවත ඇල පුළුල් කර වැඩි ජල ධාරිතාවක් රඳවා ගත හැකි ලෙස සංවර්ධනය කිරීමත්, ඒ ආශ්‍රිත නඩත්තු මාර්ගයක් ඉදිකිරීමත් එහි ප්‍රධාන කොටස් අතර වේ.ක්ෂේත්‍ර නිරීක්ෂණයට පළාත් පාලන නියෝජිතයන්, ඉංජිනේරුවන්, නාගරික සැලසුම් ශිල්පීන් සහ ව්‍යාපෘතියට සම්බන්ධ නිලධාරීන් රැසක් ද එක්ව සිටියහ.
Discussion about this post