reported by: Musharraf Hussain
ලෝක වෙළෙඳපොළ තුළ රන් මිල ඉතිහාසයේ පළමුවරට අමෙරිකානු ඩොලර් 5,000 මට්ටම ඉක්මවා වාර්තා වී තිබේ.
විදෙස් මාධ්‍ය සඳහන් කරන්නේ, මේ වන විට රන් අවුන්සයක මිල අමෙරිකානු ඩොලර් 5,024ට වැඩි අගයකට පැමිණ ඇති බවය.මෙම තත්ත්වය පිළිබඳ අදහස් දක්වන විශේෂඥයින් පවසන්නේ, රන් මිල ඉදිරියටත් ඉහළ යා හැකි බවත්, වසර අවසානය වන විට එය ඩොලර් 5,500 සීමාවද ඉක්මවනු ඇති බවත්ය.රන් මිල ඉහළ යාමට සමගාමීව, ලෝහ වෙළෙඳපොළේ අනෙකුත් ලෝහ වර්ගවල මිලද ඉහළ ගොස් ඇති අතර, ඒ අනුව රිදී අවුන්සයක මිල අමෙරිකානු ඩොලර් 100 සීමාව ඉක්මවා තිබේ.එමෙන්ම පැලේඩියම් අවුන්සයක මිල 0.17%කින් වර්ධනය වී ඇති අතර, එය මේ වන විට අමෙරිකානු ඩොලර් 2,000 ඉක්මවා පවතින බවද වාර්තා වේ.විදෙස් මාධ්‍ය වැඩිදුරටත් වාර්තා කරන්නේ,
මෙලෙස රන් මිල ඉහළ යාමට මූලික වශයෙන් හේතු වී ඇත්තේ අමෙරිකානු ජනාධිපති ඩොනල්ඩ් ට්‍රම්ප් විසින් ගනු ලැබූ තීරණ සහ ප්‍රකාශ බවය.වෙනිසියුලානු ජනාධිපති නිකොලස් මදුරෝ සම්බන්ධයෙන් අමෙරිකාව ගත් පියවර, ග්‍රීන්ලන්තය පිළිබඳ ට්‍රම්ප් කළ ප්‍රකාශ, ආක්ටික් කලාපයේ අමෙරිකානු උපායමාර්ගික අවශ්‍යතා, මෙන්ම පසුගියදා කැනඩාවෙන් ආනයනය වන භාණ්ඩ සඳහා 100%ක තීරුබදු පනවන බවට කළ අනතුරු ඇඟවීමද, රන් මිල ඉහළ යාමට බලපා ඇති කරුණු ලෙස සඳහන් වේ.
Discussion about this post