Reported Journalist:Zamil Shafeek
ඉදිරි දශකය තුළ සෑම ශ්‍රී ලාංකිකයෙකුටම ආරක්ෂිත, පිරිසිදු හා තිරසර පානීය ජලය ලබාදීම රටේ ප්‍රමුඛ ජාතික ඉලක්කයක් බවට පත් කළ යුතු බව විද්‍යා හා තාක්ෂණ අමාත්‍ය මහාචාර්ය ක්‍රිෂාන්ත අබේසේන මහතා පවසයි.
කොළඹදී පැවති ජල සම්පත් කළමනාකරණයට අදාළ කලාපීය පුහුණු වැඩසටහනක සමාරම්භක අවස්ථාවට එක්වෙමින් අමාත්‍යවරයා සඳහන් කළේ, ජල හිඟයට සහ භූගත ජල සම්පත් සංරක්ෂණයට විද්‍යාත්මක හා නවීන තාක්ෂණික විසඳුම් යොදා ගැනීම කාලීන අවශ්‍යතාවක් බවයි.
භූගත ජලය කාර්යක්ෂමව කළමනාකරණය කිරීම සඳහා සමස්ථානික තාක්ෂණය භාවිතා කිරීම පිළිබඳ කලාපීය දැනුම හා හැකියාවන් වර්ධනය කිරීම මෙම වැඩසටහනේ ප්‍රධාන අරමුණ ලෙස ද පෙන්වා දෙන ලදී.
වියළි කලාපවල ජනතාව මුහුණ දෙන ජල ගුණාත්මකභාවය හා නිදන්ගත වකුගඩු රෝගය අතර ඇති විය හැකි සම්බන්ධතාව පිළිබඳ වැඩිදුර විද්‍යාත්මක පර්යේෂණවල අවශ්‍යතාව ද අමාත්‍යවරයා අවධාරණය කළේය.
එමෙන්ම, ප්‍රති ආසෘති (RO) ජල පිරිපහදු පද්ධති ප්‍රයෝජනවත් වුවද, ඒවායේ දිගුකාලීන සෞඛ්‍ය බලපෑම් පිළිබඳ තවදුරටත් පර්යේෂණ අවශ්‍ය බැවින්, එය පමණක් ස්ථිර විසඳුමක් ලෙස නොසැලකිය යුතු බවද ඔහු සඳහන් කළේය.
දේශගුණික විපර්යාස හේතුවෙන් ජල සම්පත් සම්බන්ධ අභියෝග වැඩිවෙමින් පවතින බැවින්, තිරසර ජල කළමනාකරණය සඳහා කලාපීය සහයෝගීතාව, දැනුම හුවමාරුව සහ නවීන තාක්ෂණය භාවිතය තවදුරටත් ශක්තිමත් කළ යුතු බව ද මෙහිදී අවධාරණය විය.
Discussion about this post