Reported Journalist:Zamil Shafeek
2025 අ.පො.ස. උසස් පෙළ විභාගයෙන් විශිෂ්ට දක්ෂතා දැක්වූ සිසුන් දිස්ත්‍රික් මට්ටමින් ඇගයීමේ ජනාධිපති අරමුදල් වැඩසටහනේ පළමු වැඩසටහන කිලිනොච්චියේදී පැවැත්විණි.
2025 වසරේ ආරම්භ කළ මෙම වැඩසටහන යටතේ සෑම විෂය ධාරාවකින්ම දිස්ත්‍රික් මට්ටමින් ඉහළම ප්‍රතිඵල ලබාගත් සිසුන් 20 දෙනෙකු බැගින් ඇගයීමට මෙවර පියවර ගෙන තිබේ. පසුගිය වසරේ මෙම සංඛ්‍යාව සිසුන් 10 දෙනෙකුට සීමා වී තිබිණි.
දිවයිනේ සියලු දිස්ත්‍රික්ක ආවරණය වන පරිදි සිසුන් 3,000කට ආසන්න පිරිසකට රුපියල් ලක්ෂයක මූල්‍යාධාරයක් සහ ඇගයීම් සහතිකයක් ලබාදීමට නියමිතය.උතුරු පළාතේ යාපනය, කිලිනොච්චිය, මන්නාරම, වවුනියාව සහ මුලතිව් යන දිස්ත්‍රික්ක පහේ විෂය ධාරා හයකින් පළමු ස්ථානයේ සිට 20 වැනි ස්ථානය දක්වා ලබාගත් සිසුන් 480 දෙනෙකු මෙහිදී ඇගයීමට ලක් කෙරිණි.
මෙහිදී කථානායක වෛද්‍ය ජගත් වික්‍රමරත්න මහතා සඳහන් කළේ දරුවන්ගේ අධ්‍යාපනය වෙනුවෙන් ජනාධිපති අරමුදල මඟින් ක්‍රියාත්මක වැඩසටහන් තවදුරටත් පුළුල් කර ඇති බවයි.යාපනය විශ්වවිද්‍යාලයේ ජ්‍යෙෂ්ඨ කථිකාචාර්ය ස්වාමීනාදන් විමල් මහතා සඳහන් කළේ දියුණු මානව සම්පතක් ගොඩනැගීමේ වැඩපිළිවෙළට මෙවැනි සහාය වැදගත් දායකත්වයක් ලබාදෙන බවයි.
උත්සවයට උතුරු පළාත් ආණ්ඩුකාර නාගලිංගම් වේදනායගම්, ධීවර, ජලජ සහ සාගර සම්පත් අමාත්‍ය රාමලිංගම් චන්ද්‍රසේකර් ඇතුළු මහජන නියෝජිතයන්, රාජ්‍ය නිලධාරීන්, විදුහල්පතිවරුන්, ගුරුවරුන්, දෙමාපියන් සහ සිසුන් පිරිසක් සහභාගී වූහ.
Discussion about this post