Reported Journalist:Zamil Shafeek
අසභ්‍ය ඡායාරූප සහ වීඩියෝ බෙදාහරිමින් කාන්තාවන් සහ ළමයින් අපයෝජනයට ලක් කිරීම ප්‍රවර්ධනය කරන ෆේස්බුක් ගිණුම් සහ කණ්ඩායම් අක්‍රිය කිරීමට ශ්‍රී ලංකා පොලිසිය කඩිනම් පියවර ගෙන තිබේ.
පොලිසිය සඳහන් කළේ, මෙම මෙහෙයුම පොලිස් පරිගණක අපරාධ විමර්ශන අංශයේ මඟපෙන්වීම යටතේ ක්‍රියාත්මක කරන බවයි.
මෙම සිද්ධීන් සම්බන්ධයෙන් ළමා හා කාන්තා අපයෝජන නිවාරණ කාර්යාංශය විසින් බෙලිඅත්ත ප්‍රදේශයේදී 21 හැවිරිදි සැකකරුවෙකු අත්අඩංගුවට ගෙන තිබේ.
කාන්තාවන් සහ ළමයින් සම්බන්ධ අසභ්‍ය රූප සහ අන්තර්ගත බෙදාහරින ෆේස්බුක් කණ්ඩායම් පවත්වාගෙන යාම සම්බන්ධයෙන් සැකකරුට චෝදනා එල්ල වී ඇති බව පොලිසිය සඳහන් කරයි.
සැකකරුගේ ජංගම දුරකථනයද පොලිස් භාරයට ගෙන ඇති අතර, සිද්ධිය සම්බන්ධයෙන් වැඩිදුර විමර්ශන ක්‍රියාත්මකයි.
මෙවැනි නීති විරෝධී ක්‍රියාකාරකම්වලට සම්බන්ධ සමාජ මාධ්‍ය ගිණුම් සහ කණ්ඩායම් පිළිබඳ තොරතුරු ලබාදෙන ලෙස පොලිසිය මහජනතාවගෙන් ඉල්ලා සිටී.
සමාජ මාධ්‍ය ඔස්සේ හිරිහැර හෝ අපහසුතාවට පත්කරන අන්තර්ගත සම්බන්ධ පැමිණිලි ccid.report@police.gov.lk වෙත යොමු කළ හැකිය.
පුද්ගලිකත්වය උල්ලංඝනය කරන පැහැදිලි හෝ සමීප ඡායාරූප සහ වීඩියෝ සම්බන්ධ පැමිණිලි dri.cid@police.gov.lk වෙත යොමු කළ හැකි බවද පොලිසිය සඳහන් කරයි.
අදාළ තොරතුරු වාර්තා කිරීම සඳහා මහජනතාවට පරිගණක අපරාධ විමර්ශන අංශය 0112 381 058 යන දුරකථන අංකයෙන්ද සම්බන්ධ කරගත හැකිය.
Discussion about this post