Reported Journalist:Zamil Shafeek
‘බස් ලලිත්’ ඩුබායි සිට හෙට මෙරටට රැගෙන ඒමට නියමිතයිඩුබායිහිදී අත්අඩංගුවට ගෙන සිටින සංවිධානාත්මක අපරාධ කල්ලි සාමාජිකයෙකු ලෙස සැලකෙන ලලිත් කන්නන්ගර හෙවත් ‘බස් ලලිත්’ හෙට (25) ශ්‍රී ලංකාවට රැගෙන ඒමට නියමිත බව පොලිස් ආරංචි මාර්ග සඳහන් කරයි.
අපරාධ පරීක්ෂණ දෙපාර්තමේන්තුව, මධ්‍යම අපරාධ විමර්ශන කාර්යාංශය සහ රාජ්‍ය බුද්ධි සේවය එක්ව සිදුකළ විමර්ශනවලින් අනතුරුව ඩුබායි පොලිසියේ සහාය ඇතිව ඔහු පසුගිය වසරේ ඔක්තෝබර් මාසයේදී අත්අඩංගුවට ගෙන තිබිණි.ඔහු ශ්‍රී ලංකාවට රැගෙන ඒම සඳහා මධ්‍යම අපරාධ විමර්ශන කාර්යාංශයේ අධ්‍යක්ෂ ජ්‍යෙෂ්ඨ පොලිස් අධිකාරී කමල් ආරියවංශ මහතාගේ ප්‍රධානත්වයෙන් පොලිස් හා බුද්ධි අංශ නිලධාරීන් කණ්ඩායමක් මේ වන විට ඩුබායි වෙත ගොස් සිටින බව සඳහන් වේ.
හංවැල්ල සහ ඒ අවට ප්‍රදේශවල ව්‍යාපාරිකයන්ගෙන් කප්පම් ලබාගැනීම, මත්ද්‍රව්‍ය ජාවාරම්, කොන්ත්‍රාත් ඝාතන සහ ඉඩම් බලහත්කාරයෙන් අත්පත් කරගැනීම් ඇතුළු චෝදනා රැසක් ඔහුට එල්ල වී ඇති බව පොලිසිය පවසයි.විමර්ශනවලදී ඝාතන කිහිපයක් සහ වෙඩි තැබීම් සම්බන්ධයෙන්ද ඔහුට එරෙහිව තොරතුරු අනාවරණය වී ඇති බව සඳහන් වේ.
අත්අඩංගුවට ගැනීමෙන් පසුව ශ්‍රී ලංකාවට පිටුවහල් කිරීමට එරෙහිව ලලිත් කන්නන්ගර ඩුබායි අධිකරණය හමුවේ නඩු පවරා තිබූ අතර, දීර්ඝ නීතිමය ක්‍රියාවලියකින් අනතුරුව ඔහුව ශ්‍රී ලංකාවට පිටුවහල් කිරීමට එරට අධිකරණය තීරණය කර තිබේ.එම තීන්දුවට එරෙහිව ඉදිරිපත් කළ අභියාචනයද පසුගිය සතියේ ප්‍රතික්ෂේප කර ඇති අතර, ඒ අනුව ඔහු මෙරටට රැගෙන ඒම සඳහා අවශ්‍ය කටයුතු සිදුකරමින් පවතින බව වාර්තා වේ.මේ අතර, ජාත්‍යන්තර පොලිස් රතු නිවේදන නිකුත් කර තිබූ ශ්‍රී ලාංකික සංවිධානාත්මක අපරාධකරුවන් 16 දෙනෙකු මෙම වසර තුළ මේ වන විට මෙරටට රැගෙන ඒමට හැකිව ඇති බවද සඳහන් වේ.
ඩුබායි පොලිස් අත්අඩංගුවේ සිටින තවත් සංවිධානාත්මක අපරාධකරුවන් කිහිපදෙනෙකුද ඉදිරියේදී ශ්‍රී ලංකාවට භාරදීමට හැකිවනු ඇතැයි පොලිසිය අපේක්ෂා කරයි.
Discussion about this post