Reported Journalist:Zamil Shafeek
රුපියල් මිලියන 14.7ක වියදමින් ඉදිකරන ලද පොකුණුවිට නව තැපැල් කාර්යාල ගොඩනැගිල්ල ඊයේ (22) ජනතා අයිතියට පත් කෙරිණි.තැපැල් සේවාවේ යටිතල පහසුකම් සංවර්ධනය කිරීම සඳහා රුපියල් මිලියන 600ක ප්‍රතිපාදන යටතේ ඉදිකිරීම් ආරම්භ කළ නව තැපැල් කාර්යාල 17 අතරින් ජනතා අයිතියට පත් කළ 11 වැනි තැපැල් කාර්යාලය මෙය බව සඳහන් වේ.
මීට අමතරව තැපැල් කාර්යාල 209ක් නවීකරණය කිරීම සඳහාද රුපියල් මිලියන 600ක මුදලක් වෙන් කර ඇති අතර, එම නවීකරණ කටයුතු අවසන් කර තිබේ.නවීකරණය කරන තැපැල් සේවාව සාම්ප්‍රදායික තැපැල් කටයුතුවලට පමණක් සීමා නොකර, කුඩා හා මධ්‍ය පරිමාණ ව්‍යවසායකයන් මෙන්ම නිෂ්පාදන ක්ෂේත්‍රය සවිබලගන්වන ආර්ථික යටිතල පහසුකම් පද්ධතියක් බවට පත් කිරීම අරමුණ බව මෙහිදී ප්‍රකාශ කෙරිණි.
එමෙන්ම හොරණ නගරයේ පවතින රථවාහන තදබදය අවම කරමින් පොකුණුවිට ප්‍රදේශය උප නගරයක් ලෙස සංවර්ධනය කිරීමටද අවධානය යොමු කර ඇති බව සඳහන් වේ.මාර්ග පද්ධතිය සංවර්ධනය කිරීම, ඉංගිරිය නව කර්මාන්ත කලාපය, කහතුඩුව–ඉංගිරිය අධිවේගී මාර්ග කොටස සහ හොරණ රෝහල දිස්ත්‍රික් මහ රෝහලක් ලෙස සංවර්ධනය කිරීම හරහා ප්‍රදේශයේ ආර්ථික හා සමාජීය සංවර්ධනය වේගවත් කිරීමට අපේක්ෂා කරන බවද ප්‍රකාශ කෙරිණි.
තැපැල් සේවාවේ භෞතික පහසුකම් තවදුරටත් පුළුල් කිරීම සඳහා 2026 වසරට රුපියල් මිලියන 400ක මුදලක් වෙන් කර ඇති අතර, ඒ යටතේ නව තැපැල් කාර්යාල 7ක්, උප තැපැල් කාර්යාල 6ක් සහ බහුකාර්ය ගොඩනැගිලි 2ක් ඉදිකිරීමට නියමිතය.
මෙම අවස්ථාවට මහා සංඝරත්නය, පාර්ලිමේන්තු මන්ත්‍රීවරුන්, රාජ්‍ය නිලධාරීන්, තැපැල් දෙපාර්තමේන්තුවේ නිලධාරීන් සහ ප්‍රදේශවාසීන් ඇතුළු පිරිසක් එක්ව සිටියහ.
Discussion about this post