Reported Journalist:Zamil Shafeek
ජපානයේ පැවැත්වෙන ආසියානු ක්‍රීඩා උළෙලේ කාන්තා විස්සයි20 ක්‍රිකට් තරගාවලියේ රන් පදක්කම සඳහා වූ අවසන් තරගයට සුදුසුකම් ලැබීමට ශ්‍රී ලංකා කාන්තා කණ්ඩායම අද (20) සමත් විය.
ඒ, පළමු අවසන් පූර්ව තරගයේදී පාකිස්තාන කණ්ඩායම කඩුලු 8කින් පරාජයට පත් කරමිනි.නිශ්ෂින්හි කොරෝගි ක්‍රීඩාංගණයේ පැවති තරගයේ පළමුව පන්දුවට පහරදුන් පාකිස්තානය පන්දුවාර 20 අවසානයේ කඩුලු 4ක් දැවී ලකුණු 177ක් ලබාගත්තේය.
ජයග්‍රහණය සඳහා ලකුණු 178ක ඉලක්කයක් හඹා ගිය ශ්‍රී ලංකා ක්‍රීඩිකාවෝ පන්දුවාර 17.5කදී කඩුලු 2ක් පමණක් දැවී ලකුණු 181ක් රැස්කරමින් තරගයේ ජය තහවුරු කළහ.ශ්‍රී ලංකා ඉනිමේ වැඩිම ලකුණු ලාභිනිය වූ නායිකා චමරි අතපත්තු නොදැවී ලකුණු 83ක් රැස් කළාය.
පන්දු 50කින් ගොඩනැගුණු ඇගේ ඉනිමට හයේ පහර 6ක් සහ හතරේ පහර 7ක් ඇතුළත් විය.හසිනි පෙරේරා පන්දු 26කින් වේගවත් ලකුණු 42ක් රැස්කරමින් චමරිට අනගි සහායක් ලබාදුන්නාය.
ඇගේ ඉනිමට හයේ පහර 3ක් සහ හතරේ පහර 3ක් ඇතුළත් විය.චමරි සහ හසිනි එක්ව දෙවැනි කඩුල්ල සඳහා පන්දු 56කදී ලකුණු 95ක සබඳතාවක් ගොඩනගමින් ශ්‍රී ලංකා ජයග්‍රහණයට මඟ විවර කළහ.
අවසන් තරගයේදී ශ්‍රී ලංකාවේ ප්‍රතිවාදීන් තීරණය වන්නේ ඉන්දියාව සහ බංග්ලාදේශය අතර පැවැත්වෙන දෙවැනි අවසන් පූර්ව තරගයේ ප්‍රතිඵලය අනුවය.
Discussion about this post