Reported Journalist:Zamil Shafeek
ශ්‍රී ලාංකේය සංගීත ක්ෂේත්‍රයට දශක ගණනාවක් පුරා අමිල මෙහෙවරක් ඉටු කළ ප්‍රවීණ ගායන ශිල්පිනී ආචාර්ය නන්දා මාලිනී මහත්මියගේ අවසන් කටයුතු ඊයේ (22) පස්වරුවේ බොරැල්ල පොදු සුසාන භූමියේදී සිදු කෙරිණි.
82 වැනි වියේ පසුවූ නන්දා මාලිනී මහත්මිය පසුගිය 20 වැනිදා නාවල පිහිටි සිය නිවසේදී අභාවප්‍රාප්ත වූවාය.1943 අගෝස්තු 23 වැනිදා අලුත්ගම ලෙවන්දූව ප්‍රදේශයේ උපත ලැබූ ඇය කුඩා අවධියේ සිටම සිය ගායන හැකියාවන් ප්‍රකට කළාය. පසුව කරුණාරත්න අබේසේකර මහතා මෙහෙයවූ ‘ළමා මණ්ඩපය’ ගුවන්විදුලි වැඩසටහන ඔස්සේ ඇගේ සංගීත දිවියට නව මාවතක් විවර විය.‘බුදු සාදු’ ගීතය හරහා ජනප්‍රියත්වයට පත් වූ නන්දා මාලිනී මහත්මිය, 1961 වසරේ ‘රන්මුතු දූව’ චිත්‍රපටය වෙනුවෙන් නාරද දිසාසේකර මහතා සමඟ ගායනා කළ ‘ගලන ගඟකි ජීවිතේ’ ගීතය හරහා සිනමා සංගීතයටද පිවිසියාය.
දශක ගණනාවක් පුරා ඇය ගායනා කළ ගීත රැසක් ශ්‍රී ලාංකීය රසිකයන් අතර අතිශය ජනප්‍රිය වූ අතර, ‘පෙරදා මහ රෑ’, ‘පහන් කන්ද’, ‘පවන’, ‘තාරුකා ඇස්’, ‘පාවෙනා’, ‘කිඳුරියකගේ විලාපය’, ‘පෙම්බර ලංකා’ සහ ‘ඔබයි රම්‍ය සඳ කිරණ’ ඇතුළු ගීත අදටත් රසික හදවත් තුළ රැඳී පවතී.ශ්‍රී ලංකාවේ සංගීත ක්ෂේත්‍රයට කළ සුවිශේෂී දායකත්වය වෙනුවෙන් ඇය සම්මාන රැසකින්ද පිදුම් ලැබුවාය.
නන්දා මාලිනී මහත්මියගේ දේහය නාවල පිහිටි නන්දා මාලිනී සංගීත ආශ්‍රමයේ මහජන ගෞරවය සඳහා තැන්පත් කර තිබූ අතර, දේශපාලනඥයන්, කලාකරුවන් ඇතුළු විශාල පිරිසක් ඇයට අවසන් ගෞරව දැක්වූහ.ඊයේ පස්වරු 3.30ට පමණ නාවලින් පිටත් වූ දේහය රැගත් රිය පෙරහැර පස්වරු 5ට පමණ බොරැල්ල පොදු සුසාන භූමිය වෙත ළඟා විය.
ඇගේ අවසන් කැමැත්තට අනුව කිසිදු උත්සවයකින් තොරව අවසන් කටයුතු සිදු කෙරුණු අතර, දශක ගණනාවක් පුරා මෙරට සංගීතයට ඇය එක් කළ අමරණීය දායකත්වය සමඟ නන්දා මාලිනී මහත්මිය ඊයේ ශ්‍රී ලාංකීය ජනතාවගෙන් සදහටම සමුගත්තාය.
Discussion about this post