Reported Journalist:Zamil Shafeek
හිටපු ලෝක ශූර දකුණු අප්‍රිකානු බොක්සිං ක්‍රීඩක සොලානි ටෙටේ වෙඩි ප්‍රහාරයකින් ජීවිතක්ෂයට පත්ව තිබේ.38 හැවිරිදි ටෙටේ දකුණු අප්‍රිකාවේ නැගෙනහිර කේප් ප්‍රදේශයේ Mdantsane හි පිහිටි සිය නිවස ආසන්නයේදී මෙම ප්‍රහාරයට ලක්ව ඇති බව වාර්තා වේ.පොලිසිය සඳහන් කරන්නේ, නිවසේ ගේට්ටුව විවෘත වන තෙක් මෝටර් රථය තුළ රැඳී සිටි ටෙටේ වෙත මුහුණු ආවරණ පැළඳ සිටි සන්නද්ධ පුද්ගලයින් දෙදෙනෙකු විසින් වෙඩි තබා ඇති බවයි.
සිද්ධියෙන් ටෙටේ සමඟ මෝටර් රථයේ සිටි 27 හැවිරිදි කාන්තාවකටද වෙඩි වැදී ඇති අතර, ඇය රෝහල්ගතව ප්‍රතිකාර ලබමින් සිටින බව පොලිසිය පවසයි.ටෙටේ 2007–2008 කාලයේ WBF ෆ්ලයිවෙයිට් ලෝක ශූරතාව දිනාගත් අතර, 2017 සහ 2019 අතර කාලයේ WBO බැන්ටම්වෙයිට් ලෝක ශූරයා ලෙසද කටයුතු කළේය.2017 වසරේ Siboniso Gonya සමඟ පැවති ලෝක ශූරතා තරගයේදී තරගය ආරම්භ වී තත්පර 11ක් තුළ ප්‍රතිවාදියා පිළිමළුන් පිටුදැකීම ඔහුගේ වෘත්තීය දිවියේ සුවිශේෂී අවස්ථාවක් විය.
ටෙටේගේ වෘත්තීය බොක්සිං වාර්තාව ජයග්‍රහණ 29ක්, එයින් පිළිමළුන් පිටුදැකීම් 22ක්, පරාජයන් 4ක් සහ ජය පරාජයෙන් තොර තරගයක් ලෙස දැක්වේ.කෙසේ වෙතත්, තහනම් උත්තේජකයක් සම්බන්ධ පරීක්ෂණයකදී ධනාත්මක ප්‍රතිඵලයක් වාර්තා වීමෙන් අනතුරුව ඔහුට වසර හතරක තරග තහනමක් පනවා තිබූ අතර, එම තහනම අවසන් වීමෙන් පසු නැවත බොක්සිං පිටියට පිවිසීමට ඔහු සූදානමින් සිටි බව වාර්තා වේ.
ටෙටේගේ ඝාතනය සම්බන්ධයෙන් පොලිසිය වැඩිදුර විමර්ශන සිදුකරන අතර, සැකකරුවන් සම්බන්ධයෙන් මෙතෙක් තොරතුරු අනාවරණය වී නොමැත.
Discussion about this post