Reported Journalist:Zamil Shafeek
ඉන්දුනීසියා ජනරජයේ කොළඹ තානාපති කාර්යාලය, ඉන්දුනීසියාව සහ ශ්‍රී ලංකාව අතර සංස්කෘතික හුවමාරුව හා ජනතාව අතර සබඳතා තවදුරටත් ශක්තිමත් කිරීමේ අරමුණින් ඉන්දුනීසියා සංස්කෘතික මධ්‍යස්ථානය පසුගියදා නිල වශයෙන් විවෘත කළේය.
මෙම සංස්කෘතික මධ්‍යස්ථානය ශ්‍රී ලංකාවේ ඉන්දුනීසියානු තානාපතිනිය වන ඩේවි ගුස්ටිනා ටොබිං මහත්මිය විසින් නිල වශයෙන් විවෘත කරන ලද අතර, ශ්‍රී ලංකාවේ බුද්ධශාසන, ආගමික හා සංස්කෘතික කටයුතු අමාත්‍ය මහාචාර්ය හිනිදුම සුනිල් සෙනෙවි මහතා ප්‍රධාන ආරාධිත අමුත්තා ලෙස සහභාගි විය. ආගමික හා සංස්කෘතික කටයුතු නියෝජ්‍ය අමාත්‍ය මුනීර් මුලාෆර් මහතා, විවිධ රාජ්‍යතාන්ත්‍රික දූත මණ්ඩලවල තානාපතිවරුන් සහ නියෝජිතයන්, පාසල් විදුහල්පතිවරුන්, විශ්වවිද්‍යාල ආචාර්යවරුන්, සිසුන්, කලාකරුවන් සහ සංස්කෘතික ක්ෂේත්‍රයේ නියුතු පිරිස් ඇතුළු විශාල පිරිසක් මෙම අවස්ථාවට සහභාගි වූහ.
ශ්‍රී ලාංකික ජනතාවට ඉන්දුනීසියානු සංස්කෘතිය පිළිබඳ දැනගැනීමටත්, එය අත්විඳීමටත් අවස්ථාව සලසන ස්ථානයක් ලෙස මෙම මධ්‍යස්ථානය ස්ථාපිත කර ඇත. මෙහි ඉන්දුනීසියානු පොත් සහ සංස්කෘතික ද්‍රව්‍ය ඇතුළත් පුස්තකාලයක්, ජාවානු ගැමෙලාන් (Javanese Gamelan) සහ ඇන්ග්ක්ලුං (Angklung) වැනි සාම්ප්‍රදායික සංගීත භාණ්ඩ, වයං කුලිත් (Wayang Kulit) සහ වයං ගොලෙක් (Wayang Golek) රූකඩ, සාම්ප්‍රදායික නර්තන පුහුණුව සඳහා ස්ථානයක්, ඉන්දුනීසියානු භාෂා පන්ති පැවැත්වීමේ පහසුකම් සහ ඉන්දුනීසියානු චිත්‍රපට ප්‍රදර්ශනය සඳහා පහසුකම් ද ඇතුළත් වේ.
විවෘත කිරීමේ උත්සවය අතරතුර උතුරු සුමාත්‍රාවේ බටක් (Batak) ජන ප්‍රජාවෙන් ආරම්භ වූ සාම්ප්‍රදායික නර්තනයක් වන ටාරි ටෝර් ටෝර් (Tari Tor Tor) ද ඉදිරිපත් කෙරිණි. ශ්‍රී ලංකාවේ කළුතර පිහිටි සංක සමුදි පර්ෆෝමින් ආර්ට් ෆවුන්ඩේෂන් හි නර්තන ශිල්පීන් විසින් ඉදිරිපත් කළ මෙම නර්තනය, ඉන්දුනීසියාවේ සාම්ප්‍රදායික රංග කලාවේ පොහොසත් බව ශ්‍රී ලාංකික ප්‍රේක්ෂකයන් වෙත ගෙන ඒමට සමත් විය.මීට අමතරව, සංස්කෘතික වැඩසටහන තවත් විවිධාංගීකරණය කරමින් බාලි දූපතට ආවේණික ටාරි ලෙගොං බපාං සබා (Tari Legong Bapang Saba) නර්තනය ද ඉන්දුනීසියානු තානාපති කාර්යාලයේ කාර්ය මණ්ඩල සාමාජිකයන් විසින් ඉදිරිපත් කරන ලදී.
එහි මනරම් චලන, විශේෂිත මුහුණේ හැඟීම් සහ අලංකාර නර්තන වින්‍යාසය මගින් ඉන්දුනීසියාවේ පොහොසත් හා විවිධ සංස්කෘතික උරුමයේ තවත් සුවිශේෂී අංගයක් අත්විඳීමට ප්‍රේක්ෂකයන්ට අවස්ථාව හිමි විය.
Discussion about this post