Reported Journalist:Zamil Shafeek
ලෙබනනය වෙත හොර රහසේ ප්‍රවාහනය කිරීමට සූදානම් කර තිබූ බව කියන ආයුධ තොගයක් සිරියානු බලධාරීන් අත්අඩංගුවට ගෙන තිබේ.
සිරියානු රේගු හා වරාය අධිකාරිය නිවේදනය කළේ, ලෙබනනය බලා ගමන් කළ වාහනයක සඟවා තිබූ වැඩිදියුණු කළ පුපුරණ ද්‍රව්‍ය 226ක් සොයාගෙන රාජසන්තක කළ බවයි.
එමෙන්ම, පසුගිය සතියේ ඉරාක දේශසීමා ආශ්‍රිත ප්‍රදේශයකදී දිගු දුර මිසයිල, රොකට් සහ ඩ්‍රෝන යානා ඇතුළු තවත් ආයුධ තොගයක්ද අත්අඩංගුවට ගත් බව සිරියානු බලධාරීහු ප්‍රකාශ කළහ.
ඔවුන්ගේ චෝදනාව වන්නේ එම ආයුධ ලෙබනනයේ හිස්බුල්ලා සංවිධානය වෙත ජාවාරම් කිරීමට උත්සාහ කර ඇති බවයි.
කෙසේ වෙතත්, ඉරානයේ සහාය ලබන හිස්බුල්ලා සංවිධානය එම චෝදනා ප්‍රතික්ෂේප කරමින්, සිරියාව තුළ තමන් කිසිදු මෙහෙයුමක් සිදු නොකරන බව ප්‍රකාශ කර තිබේ.
තවද, තම සංවිධානය අපකීර්තියට පත් කිරීමේ අරමුණින් කිසිදු පදනමක් නොමැති චෝදනා එල්ල කර ඇති බවද එම සංවිධානය සඳහන් කළේය.
Discussion about this post