Reported Journalist:Zamil Shafeek
හෝර්මුස් සමුද්‍ර සන්ධියේදී එක්සත් අරාබි එමීර් රාජ්‍යයට අයත් තෙල් ප්‍රවාහන නෞකා දෙකකට ඉරානය විසින් කෲස් මිසයිල ප්‍රහාරයක් එල්ල කර ඇති අතර, එම ප්‍රහාරයෙන් ඉන්දීය ජාතික කාර්ය මණ්ඩල සාමාජිකයෙකු මියගොස් තවත් අටදෙනෙකු තුවාල ලබා ඇති බව එක්සත් අරාබි එමීර් රාජ්‍යයේ ආරක්ෂක අමාත්‍යාංශය නිවේදනය කර තිබේ.
තුවාල ලැබූවන් අටදෙනාගෙන් සිව්දෙනෙකුගේ තත්ත්වය බරපතළ බවත්, තුවාලකරුවන් අතර ඉන්දීය ජාතිකයින් හයදෙනෙකු සහ යුක්රේන ජාතිකයින් දෙදෙනෙකු සිටින බවත් එම අමාත්‍යාංශය සඳහන් කරයි.ආරක්ෂක අමාත්‍යාංශයට අනුව, “මොම්බාසා” සහ “අල් බහියා” නමැති නෞකා දෙක ඕමාන මුහුදු සීමාව තුළ පිහිටි හෝර්මුස් සමුද්‍ර සන්ධියේ දකුණු නාවික මංතීරුවේ ගමන් කරමින් සිටියදී මෙම ප්‍රහාරයට ලක්ව ඇත.
මියගිය ඉන්දීය ජාතික කාර්ය මණ්ඩල සාමාජිකයා “මොම්බාසා” නෞකාවේ සේවය කරමින් සිටි අයෙකු බව ද සඳහන් වේ.ප්‍රහාරයත් සමඟ නෞකා දෙකෙහිම ගින්නක් හටගෙන ඇති අතර, පසුව එම ගින්න මැඩපවත්වා තිබුණද නෞකා දෙකට සැලකිය යුතු හානි සිදුව ඇති බව වාර්තා වේ.
මෙම ප්‍රහාරය “නිර්ලජ්ජිත ප්‍රහාරයක්” ලෙස හෙළා දකින එක්සත් අරාබි එමීර් රාජ්‍යය, ජාත්‍යන්තර නීතිය උල්ලංඝනය කළ මෙම ක්‍රියාවට ප්‍රතිචාර දැක්වීමේ සම්පූර්ණ අයිතිය තමන් සතු බව අවධාරණය කර ඇත. තවද රටේ ආරක්ෂාවට එල්ල වන ඕනෑම තර්ජනයකට මුහුණ දීම සඳහා පූර්ණ සූදානමින් සිටින බවත්, අවශ්‍ය සියලු ක්‍රියාමාර්ග ගන්නා බවත් එරට ආරක්ෂක අමාත්‍යාංශය වැඩිදුරටත් සඳහන් කර තිබේ.
Discussion about this post