ක්‍රීඩකයෙකු, පුහුණුකරුවෙකු හා නිලධාරියෙකු ලෙස කැපී පෙනුණු ආරියසේන මහතාගේ අවසන් ගමන

Reported by: MUSHARRAF HUSSAIN

1970 සහ 1980 දශකවල ශ්‍රී ලංකා මලල ක්‍රීඩාව ජාත්‍යන්තර මට්ටමට රැගෙන ගිය ප්‍රමුඛ පෙළේ දුර ධාවන ක්‍රීඩකයෙකු වූ විශ්‍රාමික මේජර් ඩබ්ලිව්.ජී. ආරියසේන මහතා අද (13) පෙරවරුවේ මාතලේ ප්‍රදේශයේ සිදුවූ හදිසි අනතුරකින් අභාවප්‍රාප්ත වී තිබෙනවා.

Uzbekistan Calls for Restraint After Deadly Attack in Riyadh

October 22, 2026

Nepal Embassy Celebrates Bada Dashain 2083 with Tika and Jamara Ceremony in Colombo

October 22, 2026

මියයන විට 74 වැනි වියේ පසු වූ ඒ මහතා ශ්‍රී ලංකා ක්‍රීඩා ඉතිහාසයේ කැපී පෙනෙන චරිතයක් ලෙස සැලකෙන අතර, සිය ක්‍රීඩා දිවිය පුරාම රට වෙනුවෙන් විශාල දායකත්වයක් ලබා දුන් ක්‍රීඩකයෙකු ලෙස ප්‍රසිද්ධියට පත්ව සිටියා.

ජාත්‍යන්තර තරග බිම්වලදී ශ්‍රී ලංකාවේ නාමය ඉහළට ඔසවා තැබූ ආරියසේන මහතා, 1982 වසරේ ඉන්දියාවේ පැවති 9 වැනි ආසියානු ක්‍රීඩා උළෙලටත්, 1987 වසරේ සිංගප්පූරුවේ පැවති 6 වැනි ආසියානු මලල ක්‍රීඩා ශූරතාවලියටත් ශ්‍රී ලංකාව නියෝජනය කර තිබෙනවා.1980 සිට 1989 දක්වා වසර නවයක කාලයක් මීටර් 1500 ඉසව්වේ ජාතික වාර්තාව තමන් සතු කරගත් ඔහු, එම කාලයේ ශ්‍රී ලංකාවේ ප්‍රමුඛතම මධ්‍ය දුර ධාවකයෙකු ලෙස ද සැලකුණා.

එමෙන්ම 1976 සිට 1980 දක්වා අඛණ්ඩව පස් වතාවක් ජාතික මැරතන් ශූරතාව දිනාගත් ඔහු, 1979 සිට 1984 දක්වා කාලය තුළ මීටර් 5000 සහ 10000 ඉසව්වලද සුවිශේෂී දක්ෂතා ප්‍රදර්ශනය කළා.1970 දශකයේ අග භාගයේදී ශ්‍රී ලංකා යුධ හමුදාවේ සිංහ රෙජිමේන්තුවේ ස්වේච්ඡා බළකායට එක්වූ ආරියසේන මහතා, පසුව 1980 වසරේ ක්‍රීඩා අමාත්‍යාංශයේ ක්‍රීඩා නිලධාරියෙකු ලෙස ද සේවයට එක්වුණා.ක්‍රීඩා පිටියෙන් සමුගැනීමෙන් අනතුරුවද නව පරපුරේ ක්‍රීඩක ක්‍රීඩිකාවන් ගොඩනැගීම සහ ක්‍රීඩාවේ ප්‍රවර්ධනය වෙනුවෙන් ඔහු අඛණ්ඩව කැපවී කටයුතු කළා.

වසර 35කට අධික කාලයක් ශ්‍රී ලංකා මලල ක්‍රීඩා ආයතනයේ විනිසුරුවරයෙකු සහ ජාතික තාක්ෂණික නිලධාරියෙකු ලෙස සේවය කළ ඔහුගේ දායකත්වය ක්‍රීඩා ක්ෂේත්‍රය තුළ විශාල ගෞරවයකට පාත්‍ර වී තිබෙනවා.මාතලේ නාඋල ප්‍රදේශයේ පදිංචිව සිටි ඩබ්ලිව්.ජී. ආරියසේන මහතා දියණියන් දෙදෙනෙකුගේ ආදරණීය පියෙකු වන අතර, ඔහුගේ අභාවය ශ්‍රී ලංකා මලල ක්‍රීඩා ක්ෂේත්‍රයට පිරවිය නොහැකි පාඩුවක් ලෙස සැලකෙනවා.