Reported by: Musharraf Hussain
දිට්වා සුළි කුණාටුවෙන් සිදුවූ විනාශයෙන් බලපෑ ආගමික සිද්ධස්ථාන යළි ගොඩනැගීම සහ බැතිමතුන්ගේ ආගමික කටයුතු සාමාන්‍ය පරිදි සිදු කළ හැකි පරිසරයක් සකස් කිරීම අරමුණු කරගනිමින්, රජය නව ජාතික වැඩසටහනක් ආරම්භ කිරීමට තීරණය කර ඇත.
‘ගොඩනගමු – අධිෂ්ඨානයේ සංහිඳ’ නමින් ක්‍රියාත්මක වන මෙම වැඩසටහන ජනාධිපති අනුර කුමාර දිසානායක මහතාගේ සහභාගිත්වයෙන් හෙට (27) ආරම්භ වන අතර, එහි ප්‍රථම අදියර පෙරවරු 10.00ට ගම්පොළ දොරගල ප්‍රදේශයේ පිහිටි පීකොක් හිල් ජනපදයේ ශ්‍රී බෝධිරුක්ඛාරාම විහාරස්ථානයෙන් ආරම්භ කිරීමට නියමිතය. එදිනම පස්වරු 3.00ට මාතලේ කවටයාමුණ පුරාණ රජමහා විහාරයෙන් වැඩසටහනේ තවත් අදියරක් ක්‍රියාත්මක කෙරේ.පසුගිය ආපදා තත්ත්වය හේතුවෙන් ආගමික ස්ථාන, සංස්කෘතික මධ්‍යස්ථාන සහ පුරාවිද්‍යාත්මක වැදගත්කමක් ඇති ස්ථාන 1,000කට අධික ප්‍රමාණයකට හානි සිදුව ඇති බව වාර්තා වේ.
මෙම ස්ථාන නැවත පූර්ණ ක්‍රියාකාරී තත්ත්වයට පත් කිරීම සඳහා අවශ්‍ය ප්‍රතිසංස්කරණ කටයුතු කඩිනමින් ආරම්භ කිරීමටත්, එම කටයුතු සිදු කරන අවස්ථාවේදී පෞරාණික අගය හා ආගමික ගෞරවය සුරක්ෂිත වන ලෙස, මහා සංඝරත්නය සහ සෙසු ආගමික නායකයන්ගේ උපදෙස් මත, ජනතා සහයෝගයෙන් වැඩසටහන ක්‍රියාත්මක කිරීමට රජය සැලසුම් කර ඇත.
Discussion about this post