Reported Journalist:Zamil Shafeek
ශ්‍රී ලංකා නාවික හමුදා මාධ්‍ය අධ්‍යක්ෂ කාර්යාලය මඟින් ප්‍රකාශයට පත්කරනු ලබන ‘සයුරුවර’ සඟරාවේ 50 වැනි කලාපය සඳහා නිර්මාණ ඉදිරිපත් කර ජයග්‍රහණය කළ නාවික හමුදා සාමාජිකයන් සහ ඔවුන්ගේ පවුල්වල සාමාජිකයන් වෙත මුදල් ත්‍යාග පිරිනැමීම ඊයේ (16) නාවික හමුදා මූලස්ථානයේදී සිදු කෙරිණි.
නාවික හමුදාපති වයිස් අද්මිරාල් ඩේමියන් ප්‍රනාන්දු මහතාගේ ප්‍රධානත්වයෙන් පැවති මෙම අවස්ථාවේදී, හොඳම කාව්‍ය නිර්මාණය සඳහා වූ ත්‍යාගය බල නැවි එච්.එම්.එස්.කේ. බණ්ඩාර විසින් හිමිකර ගන්නා ලදී.
හොඳම සිතුවම් නිර්මාණය සඳහා වූ ත්‍යාගය කමාන්ඩර් (මැරීන්) නිශාන්ත ප්‍රසාද් මහතාගේ දියණිය වන දුලිනි සෙනයා උඩුගමසූරිය විසින් දිනාගත් අතර, හොඳම ඡායාරූපය සඳහා වූ ත්‍යාගය ලුතිනන් කමාන්ඩර් (කිමිදුම්) යොමාල් වීරසිංහ මහතාට හිමි විය.
නාවික හමුදා සාමාජිකයන්ගේ නිර්මාණාත්මක හැකියාවන් වර්ධනය කිරීමේ අරමුණින් 2007 වසරේ සිට ‘සයුරුවර’ සඟරාව ප්‍රකාශයට පත් කරනු ලබයි. නාවික හමුදා සාමාජිකයන්ගේ සහ ඔවුන්ගේ පවුල්වල සාමාජිකයන්ගේ සාහිත්‍ය, චිත්‍ර හා ඡායාරූපකරණ දක්ෂතා එළිදැක්වීමට මෙම සඟරාව අවස්ථාව සලසයි.
Discussion about this post