Reported by: Musharraf Hussain
ජාතික මැණික් සහ ස්වර්ණාභරණ අධිකාරිය නාරාහේන්පිට පිහිටි සුදුසු පහසුකම්වලින් තොර ගොඩනැගිල්ලක ස්ථාපිත කිරීම හේතුවෙන් පරිපාලන, සෞඛ්‍ය සහ ආරක්ෂක ගැටලු රැසක් මතුව ඇති බවට එහි සේවක සංගම් චෝදනා කරයි.
මෙම ක්‍රියාවලිය හරහා විශාල රාජ්‍ය මුදල් නාස්තියක් සිදුව ඇති බව පෙන්වා දෙමින් “ජාතික මැණික් සහ ස්වර්ණාභරණ අධිකාරිය සුරැකීමේ සේවක එකමුතුව” විසින් ජනාධිපතිවරයා වෙත ලිපියක් යොමු කර තිබේ.
එම ලිපියේ සඳහන් කර ඇත්තේ, පසුගිය වසර කිහිපය තුළ රාජ්‍ය භාණ්ඩාගාරයට විශාල ආදායම් දායකත්වයක් ලබාදුන් මෙම ආයතනය, මේ වන විට බලධාරීන්ගේ අත්තනෝමතික තීරණ හේතුවෙන් දැඩි අගතියකට පත්ව ඇති බවයි.
කම්කරු දෙපාර්තමේන්තුව විසින් 2026.07.02 දින සිදු කළ පරීක්ෂාවකදී, අදාළ පරිශ්‍රයේ තාප අගයන් නිර්දේශිත සීමාවන් (TLVs) ඉක්මවා ඇති බව තහවුරු වී ඇතැයි එම ලිපියේ සඳහන් වේ.දැඩි උණුසුම් තත්ත්වය හේතුවෙන් සේවකයන්ට තාප ආඝාත, හෘද රෝග, ස්වසන රෝග සහ වකුගඩු ක්‍රියාකාරීත්වයට හානි වීමේ බරපතළ අවදානමක් මතුව ඇති බවද එහි දැක්වේ.
එමෙන්ම වර්ග අඩි 17,000ක පමණ ඉඩකඩක සේවකයන් 170 දෙනෙකු සහ බාහිර ආයතන නියෝජිතයන් පිරිසක් සේවය කිරීම හේතුවෙන් එක් සේවකයෙකුට හිමිවන්නේ ඝන අඩි 100ක පමණ ඉතා සීමිත ඉඩ ප්‍රමාණයක් බවද සේවක එකමුතුව පෙන්වා දෙයි.
මේ හේතුවෙන් ප්‍රමාණවත් වාතාශ්‍රයක් නොමැති වීම, අනාරක්ෂිත විවෘත වලවල් පැවතීම, ගිනි නිවීමේ දොරටු (Fire Exits) වසා තිබීම සහ ප්‍රමාණවත් සනීපාරක්ෂක පහසුකම් නොමැති වීම ඇතුළු ගැටලු හේතුවෙන් අහිතකර සේවා පරිසරයක් නිර්මාණය වී ඇති බව එම ලිපියේ සඳහන් වේ.
නිසි බදු ගිවිසුමක් හෝ රජයේ තක්සේරු වාර්තාවක් නොමැතිව මෙම ගොඩනැගිල්ල පවත්වාගෙන යන බවත්, ඒ සඳහා අනුමාන මාසික කුලිය රුපියල් ලක්ෂ 45ත් 50ත් අතර වන බවත් සේවක සංගම් පවසයි.
මීට අමතරව, මධ්‍යම වායු සමන පද්ධතියක් (Central AC) ස්ථාපනය කරන තෙක් තාවකාලික විසඳුමක් ලෙස ගෙන ඒමට සූදානම් කර ඇති Portable AC යන්ත්‍ර සඳහා යෝජිත වියදම රුපියල් ලක්ෂ 38කට අධික බවද සඳහන් කර ඇත.
පවතින දැඩි මානසික පීඩනය සහ අපහසු සේවා තත්ත්වයන් හේතුවෙන් පසුගිය මාස 08ක කාලය තුළ සේවකයන් 11 දෙනෙකු සේවයෙන් ඉල්ලා අස්වී ඇති බවත්, ඒ හේතුවෙන් නීති අංශයේ කටයුතු සහ මැණික් ගැරීම් බලපත්‍ර නිකුත් කිරීම වැනි සේවාවන් මාස 4ක පමණ කාලයක සිට ඇණහිට ඇති බවත් එම ලිපියේ දැක්වේ.
තාවකාලික AC යන්ත්‍ර සඳහා සිදු කිරීමට නියමිත රාජ්‍ය මුදල් වැය කිරීම වහාම නතර කරන ලෙසත්, නුසුදුසු නාරාහේන්පිට ගොඩනැගිල්ලෙන් ඉවත් වී සුදුසු ස්ථානයක් කඩිනමින් තෝරා ගන්නා ලෙසත් සේවක එකමුතුව ඉල්ලා සිටී.
එමෙන්ම අක්‍රමිකතා, පෞද්ගලික හිතවත්කම් මත සිදු කළ ප්‍රසම්පාදන සහ රාජ්‍ය මුදල් අවභාවිතය සම්බන්ධයෙන් වහාම ස්වාධීන පූර්ණ පරීක්ෂණයක් ආරම්භ කරන ලෙසද එම ලිපියෙන් අවධාරණය කර ඇත.කම්කරු දෙපාර්තමේන්තු වාර්තාවේ නිර්දේශවලට අනුකූලව සේවකයන්ගේ, සේවාලාභීන්ගේ සහ වටිනා දේපළවල ආරක්ෂාව තහවුරු කරන ලෙසද සේවක සංගම් ඉල්ලා තිබේ.
අන්තර් සමාගම් සේවක සංගමය, සේවක සුභසාධක සංගමය, සමඟි සේවක සංගමය සහ ජාතික මැණික් සහ ස්වර්ණාභරණ අධිකාරියේ සේවක සංගමය යන සංවිධාන ඒකාබද්ධව මෙම ඉල්ලීම් ඉදිරිපත් කර ඇත.
_
Discussion about this post