Reported Journalist:Zamil Shafeek
ශ්‍රී ලංකා වාණිජ මණ්ඩලයට අනුබද්ධ ශ්‍රී ලංකා ප්‍රංශ ව්‍යාපාරික සභාවේ 22 වන වාර්ෂික මහා සභා රැස්වීම පසුගියදා ගෝල් ෆේස් හෝටලයේදී පැවැත්වුණි.
එහි ප්‍රධාන ආරාධිත අමුත්තා ලෙස ශ්‍රී ලංකාවේ ප්‍රංශ තානාපති රෙමි ලැම්බර්ට් (Rémi Lambert) සහභාගී විය.2026/2027 වාරය සඳහා ශ්‍රී ලංකා–ප්‍රංශ ව්‍යාපාරික සභාවේ සභාපති ලෙස ෂමීල් මොහීදීන් තේරී පත් විය.
සභාපති ධුරය භාරගනිමින් අදහස් දැක්වූ මොහීදීන් මහතා සඳහන් කළේ, ශ්‍රී ලංකාවේ වඩාත් ගෞරවනීය ව්‍යාපාරික නායකයන් රැසක් මෙම සභාවට අයත් වන අතර, ඔවුන්ගේ දැනුම, අත්දැකීම් සහ කැපවීම හේතුවෙන් සභාව වසර ගණනාවක් පුරා ශක්තිමත්ව ඉදිරියට පැමිණ ඇති බවයි.
“අප සියලු දෙනා එක්ව රට මුහුණ දුන් අභියෝගාත්මක ආර්ථික සමයන්හිදී එකිනෙකාට සහයෝගය සහ මඟපෙන්වීම ලබා දුන්නා. නව පරපුරේ ව්‍යාපාරික නායකයන් ලෙස එම ශක්තිමත් පදනම මත ගොඩනැගී සභාවේ අනාගතය හැඩගැස්වීමේ වගකීම සහ අවස්ථාව අපට තිබෙනවා,” යැයි ඔහු පැවසීය.
ඉදිරියේදී ශ්‍රී ලංකාව සහ ප්‍රංශය අතර වෙළෙඳාම, ආයෝජන සහ ආර්ථික සහයෝගීතාව තවදුරටත් ශක්තිමත් කිරීම සඳහා නවෝත්පාදන, තිරසාර සහ සියලු දෙනාට ප්‍රයෝජනවත් හවුල්කාරීත්වයන් වර්ධනය කිරීම කෙරෙහි සභාව අවධානය යොමු කරන බවද ඔහු සඳහන් කළේය.
තමන් කෙරෙහි විශ්වාසය තබා මෙම වගකීම පවරා දුන් කමිටු සාමාජිකයන්ට ස්තුතිය පළ කළ මොහීදීන් මහතා, විධායක කමිටුව සමඟ එක්ව සභාව තවදුරටත් ඉහළ මට්ටමකට ගෙන යමින් ශ්‍රී ලංකාවේ සහ ප්‍රංශයේ ව්‍යාපාරික ප්‍රජාවට වැදගත් දායකත්වයක් ලබාදීමට බලාපොරොත්තු වන බව ප්‍රකාශ කළේය.
ජෝන් කීල්ස් හෝල්ඩිංග්ස් ආයතනයේ සෆීර් හෂීම් ජ්‍යෙෂ්ඨ උප සභාපති ලෙසත්, නොයොන් ලංකා (පුද්) සමාගමේ හුස්නි සාලිහ් උප සභාපති ලෙසත් තේරී පත්විය.එමෙන්ම පියුරිටාස් (පුද්) සමාගමේ මනුර වික්‍රමසිංහ සහ හිටපු සභාපති ආන්ඩ්‍රේ ප්‍රනාන්දු ද සභාවේ කටයුතු සඳහා දායක වනු ඇත.
Discussion about this post