reported by: Musharraf Hussain
හැටන් නගරයේ ප්‍රධාන වීදියේ පිහිටි ස්වර්ණාභරණ වෙළෙඳසැලකින් රුපියල් 289,000ක් වටිනා රන් මාලයක් සොරාගෙන පලාගිය පුද්ගලයෙකු ඊයේ (24) රාත්‍රීයේ හැටන් පොලිසිය විසින් අත්අඩංගුවට ගෙන ඇත.
අත්අඩංගුවට ගත් සැකකරු හැටන් පොලිස් අපරාධ විමර්ශන අංශයේ නිලධාරීන් විසින් හැටන් මහෙස්ත්‍රාත් එස්. රාමමූර්ති මහතා වෙත ඉදිරිපත් කළ අතර, එහිදී මෙම මස 27 වනදා දක්වා රක්ෂිත බන්ධනාගාර ගත කිරීමට නියෝග ලබා දී තිබේ.මෙලෙස රක්ෂිත බන්ධනාගාර ගත කර ඇත්තේ බගවන්තලාව, කිව් වත්තේ පදිංචි 42 හැවිරිදි තිදරු පියෙකු බව පොලිස් වාර්තා සඳහන් කරයි.
රන් ආභරණ මිලදී ගැනීමේ අදහසින් පැමිණි පුද්ගලයෙකු ලෙස වෙළෙඳසැලට ඇතුළු වූ සැකකරු, එහි සේවිකාවන් පෙන්වූ ආභරණ කිහිපයක් පරීක්ෂා කර ඇති අතර, පසුව මාලයක් නිරීක්ෂණය කරන මුවාවෙන් හදිසියේම එය රැගෙන වෙළෙඳසැලෙන් පලා ගොස් තිබේ.මෙම සොරකම වෙළෙඳසැලේ සවිකර තිබූ CCTV නිරීක්ෂණ කැමරාවල ද සටහන්ව ඇති බව පොලිසිය පවසයි.ඒ අනුව, හැටන් මූලස්ථාන පොලිස් පරීක්ෂක ඩබ්ලිව්.ආර්.ඒ.ඩී. සුගතදාස මහතාට ලැබුණු තොරතුරක් අනුව, බගවන්තලාව ප්‍රදේශයේ බිරිඳගේ නිවසක සැඟව සිටියදී සැකකරු අත්අඩංගුවට ගෙන ඇත.
පොලිස් විමර්ශන අනුව හෙළි වී ඇත්තේ, සොරාගත් රන් මාලය රැගෙන හැටන් සිට වටවල දක්වා දුම්රිය මාර්ගය ඔස්සේ පා ගමනින් ගොස්, නාවලපිටිය ප්‍රදේශයේ පෞද්ගලික මූල්‍ය ආයතනයකට එය රුපියල් 169,000කට උකස් කර ඇති බවයි.එම මුදලින් කොටසක් කොළඹ අධ්‍යාපනය ලබන තම දරුවා වෙත යවා ඇති අතර, ඉතිරි මුදලින් කොටසක් ණය ගෙවීම් සඳහා භාවිතා කර ඇති බවද විමර්ශන වලදී අනාවරණය වී ඇත.
සැකකරු අත්අඩංගුවට ගන්නා අවස්ථාවේදී ඔහු සතුව තිබී ඇත්තේ රුපියල් 10,000ක මුදලක් පමණක් බව පොලිසිය වැඩිදුරටත් සඳහන් කරයි.
Discussion about this post