Reported Journalist:Zamil Shafeek
රුපියල් මිලියන 110කට ආසන්න වටිනාකමකින් යුත් කොකේන් තොගයක් සමඟ 79 හැවිරිදි ස්පාඤ්ඤ ජාතිකයෙකු කටුනායක ගුවන් තොටුපොළේදී අත්අඩංගුවට ගෙන තිබේ.
විදේශීය කෘෂිකාර්මික ඉංජිනේරුවරයෙකු වන සැකකරු පසුගිය 22 වැනිදා සියෙරා ලියෝන් සිට අඩිස් අබාබා සහ දෝහා හරහා ශ්‍රී ලංකාවට පැමිණ ඇති බව වාර්තා වේ.
ඔහු රැගෙන ආ එක් ගමන් මල්ලක් මුලදී පරීක්ෂාවට ලක් කළද කිසිදු සැකකටයුතු ද්‍රව්‍යයක් හමු නොවූ අතර, අනෙක් ගමන් මල්ල ප්‍රමාද වී පැමිණීම හේතුවෙන් එය ලබාගැනීම සඳහා සැකකරු ඊයේ (24) යළි ගුවන් තොටුපොළට පැමිණ තිබුණි.
එම ගමන් මල්ල එක්ස්-රේ පරීක්ෂාවට ලක් කිරීමේදී සැකකටයුතු සලකුණු නිරීක්ෂණය වීමෙන් අනතුරුව සිදුකළ සම්පූර්ණ පරීක්ෂාවේදී ලිපිගොනු රඳවන දෙකක් තුළ ඉතා සූක්ෂම ලෙස සඟවා තිබූ කොකේන් පාර්සල් හතරක් සොයාගෙන ඇත.
සොයාගත් කොකේන් තොගයේ මුළු බර කිලෝග්‍රෑම් 2.198ක් වන අතර, එහි දළ වීථි වටිනාකම රුපියල් මිලියන 109.9ක් පමණ ලෙස තක්සේරු කර තිබේ.
සිද්ධිය සම්බන්ධයෙන් මූලික විමර්ශන ආරම්භ කර ඇති අතර, සැකකරු සහ අත්අඩංගුවට ගත් මත්ද්‍රව්‍ය තොගය වැඩිදුර විමර්ශන සහ නීතිමය කටයුතු සඳහා පොලිස් මත්ද්‍රව්‍ය නාශක කාර්යාංශය වෙත භාරදීමට නියමිතය.
Discussion about this post