reported by: Musharraf Hussain
පාතාල කල්ලි නායකයෙකු ලෙස ප්‍රසිද්ධ වූ මාකඳුරේ මධුෂ්ගේ ඝාතනය සම්බන්ධයෙන් නැවත විමර්ශනයක් ආරම්භ කර ඇති බව අපරාධ පරීක්ෂණ දෙපාර්තමේන්තුව පවසයි.
ඔහු කොළඹ අපරාධ කොට්ඨාසය භාරයේ සිටියදී නාඳුනන තුවක්කුකරුවන් දෙදෙනෙකු විසින් වෙඩි තබා ඝාතනය කර තිබුණි.මෙම සිද්ධියට අදාළව, මධුෂ් ඝාතනය වූ දින ඔහු මාලිගාවත්ත ප්‍රදේශයට රැගෙන ගිය පොලිස් නිලධාරීන්ගෙන් ඉදිරියේදී ප්‍රකාශ ලබාගැනීමට නියමිත බවත් අපරාධ පරීක්ෂණ දෙපාර්තමේන්තුව සඳහන් කරයි.2020 ඔක්තෝබර් 20 වනදා මාලිගාවත්ත ප්‍රදේශයේදී මධුෂ් නාඳුනන තුවක්කුකරුවන් දෙදෙනෙකු විසින් වෙඩි තබා ඝාතනය කර තිබුණි. එම අවස්ථාවේදී ඔහු ලබාදුන් තොරතුරක් අනුව මත්ද්‍රව්‍ය තොගයක් සොයා ගැනීම සඳහා කොළඹ අපරාධ කොට්ඨාසයේ නිලධාරීන් ඔහුව එම ප්‍රදේශයට රැගෙන ගොස් තිබූ බවද සඳහන් වේ.
මෙම ඝාතනය පිළිබඳ පරීක්ෂණයක් සිදු කරන ලෙස ඉල්ලා මධුෂ්ගේ සහෝදරයෙකු විසින් මහජන ආරක්ෂක අමාත්‍යාංශයේ ලේකම්වරයා වෙත ඉල්ලීමක් ද කර තිබුණි. ඒ අනුව එම ඉල්ලීම පොලිස්පති වෙත යොමු කර ඇති අතර, පසුව එය අපරාධ පරීක්ෂණ දෙපාර්තමේන්තුවට විමර්ශනය සඳහා භාරදී ඇත.පසුව සිද්ධිය සම්බන්ධයෙන් කරුණු කොළඹ මහේස්ත්‍රාත් අධිකරණය වෙත වාර්තා කිරීමෙන් අනතුරුව, අධිකරණය විසින් අදාළ වෛද්‍ය නිලධාරියාගෙන් ප්‍රකාශ ලබාගැනීමටත්, මාධ්‍ය ආයතන සතුව ඇති මෙම ඝාතනයට අදාළ දර්ශන ලබාගැනීමටත් නියෝග කර ඇති බව පොලිසිය පවසයි.
_
Discussion about this post