Journalist:Zamil Shafeek
වසංගත වැළැක්වීම, සූදානම සහ ප්‍රතිචාර භාර අරමුදල (වසංගත අරමුදල) මඟින් ඇමරිකානු එක්සත් ජනපද ඩොලර් (ඇ.එ.ජ.ඩො.) මිලියන 6.9 ක අගයකින් යුතු විදේශ ප්‍රදානයක් සමඟින්, ප්‍රතිඵල පාදක ණය ක්‍රමය යටතේ ඒකාබද්ධ සෞඛ්‍ය ආරක්ෂණය සහ පාලනය ශක්තිමත් කිරීම සඳහා වන විශ්වීය සෞඛ්‍ය ආවරණ වැඩසටහන ක්‍රියාත්මක කිරීම වෙනුවෙන් ඇ.එ.ජ.ඩො. මිලියන 100 ක ණයක් ලබා ගැනීම සම්බන්ධයෙන් ශ්‍රී ලංකා රජය‚ ආසියානු සංවර්ධන බැංකුව සමඟ සාකච්ඡා පවත්වන ලදී.ශ්‍රී ලංකා රජය සහ ආසියානු සංවර්ධන බැංකුව අතර වන ණය සහ ප්‍රදාන ගිවිසුම්වලට මුදල්, ක්‍රමසම්පාදන සහ ආර්ථික සංවර්ධන අමාත්‍යාංශයේ ලේකම් ආචාර්ය හර්ෂණ සූරියප්පෙරුම මහතා ශ්‍රී ලංකා රජය වෙනුවෙන් ද‚ ආසියානු සංවර්ධන බැංකුවේ ශ්‍රී ලංකා නේවාසික අධ්‍යක්ෂ‚ ටකාෆුමි කඩෝනො මහතා ආසියානු සංවර්ධන බැංකුව වෙනුවෙන් ද‚ කොළඹ මහා භාණ්ඩාගාරයේ දී 2025 ඔක්තෝබර් මස 17 වැනි දින අත්සන් තබන ලදී.ආසියානු සංවර්ධන බැංකුවේ සාමාන්‍ය පොදු ප්‍රාග්ධන සම්පත් යටතේ ලබාගනු ලබන ඇ.එ.ජ.ඩො. මිලියන 100ක අගයකින් යුතු ඉහත ණය මුදල මඟින් විශ්වීය සෞඛ්‍ය ආවරණය සහතික කිරීම පිණිස පළමු යොමු කිරීමේ සත්කාරය ලෙස ද්විතියික සෞඛ්‍ය සේවාවන්හි වැඩිදියුණු කළ කාර්යක්ෂමතාවය සහ ගුණාත්මකභාවය සඳහා සෞඛ්‍ය සේවා සංවර්ධනය සඳහා වන ජාතික උපාය මාර්ගික රාමුවට සහාය වේ. තවද, මෙම වැඩ සටහන (i) පළමු යොමු කිරීමේ සත්කාරක සේවා වැඩිදියුණු කිරීම, (ii) වසංගත වැළැක්වීම, සූදානම සහ ප්‍රතිචාර වැඩිදියුණු කිරීම, (iii) සෞඛ්‍ය අංශයේ තාක්ෂණික ධාරිතාවය සහ ඖෂධ සැපයුම්දාම කළමනාකරණය වැඩිදියුණු කිරීම කෙරෙහි ප්‍රධාන වශයෙන් අවධානය යොමු කරන නිමැවුම් තුනකින් සමන්විත වේ.සෞඛ්‍ය හා ජනමාධ්‍ය අමාත්‍යාංශය ඉහත වැඩසටහනෙහි ප්‍රධාන විධායක සහ ක්‍රියාත්මක කිරීමේ නියෝජිතායතනය වන අතර පළාත් සෞඛ්‍ය සේවා දෙපාර්තමේන්තු නවය ද ක්‍රියාත්මක කිරීමේ නියෝජිතායතන ලෙස ක්‍රියා කරනු ලබයි.
Discussion about this post